3gp.قصه های پیامبر" - در بختیاری"

Bakhtiari(بختیاری) - "Jesus Story".3gp. // یوحنا 20 - مزارِ پَتی1 یَه‌شَمبݚ، صُحو زی، اُسو که هوا هَنی تاریک بیݚ، مریم مجدلیه اوَیݚ سر مزار و دیݚ که بَردِ زِ دَمِس وُرداشتنه. 2 پَه بِدَو رَهݚ تَی شمعوٚن پطرس و او شاگردُ که عیسی غَلوه اِخواستِس و بِسوٚۨ گوݚ: «مَیݚِ عیسی‌نه زِ مِن مَزار بُردِنه و نَونیم کویه نهاݚِنِسه.» 3 پطرس و او شاگرد دیه یونه که اَشنیݚِن زَیݚِن بِدَر و رَهݚِن طِرَفِ مَزار. 4 هر دوتاسوٚۨ وایَک اِدَونیݚِن، اما او شاگردُ تندتَر رَهݚ، و نیا پطرس زیݚ و پیٚش ز هو رَسیݚ دم مَزار. 5 کُت وابیݚ و نییَشت و تیکه‌ها دَفِنه‌نه اُچو دیݚ، اما نَرَهݚ مِنِ مَزار. 6 شمعوٚن پطرس هَم ز ره رَسیݚ و رَهݚ مِن مزار و دیݚ که تیکه‌ها دَفِنه هَمُچونِن، 7 اما دَسمالیٚ که دَور سَر عیسی بستِن بی به جا یو که کِل تیکه‌ها دَفِنه بو، تا کِرده، یَه جا دیه نهاݚه بیݚ. 8 پَه او شاگرد دیه، که اول رَسیݚ بی دم مزار، رَهݚ مِن مزار و همه چی‌نه دیݚ و ایموٚن اَوُرد. 9 اُنو هَنی مَعٛنیݚ کِتاو خݚانه نَفَهمیݚن بی که گوݚه هو وا زِ مُردِیَل وُریٚسته. 10 او دوتا شاگِرد بَعٛݚ هو وُرگَشتِن به حوٚنه‌هاسوٚۨ.عیسی به مریم مجدلیه نَمائوٚن اِبو 11 مریم، دَم در مزار، واستاݚه بی و اِگریٚوِست. وا تیا هَرس‌آلو کُت وابیݚ که مِن مَزارِ بوینه، 12 که یه مَرته دوتا مِلاکه‌نه دیݚ که جُوِه اِسبیݚ بِوَرِسوٚۨ بیݚ و نشسته بیݚِن هَمُچو که مَیِݚ عیسی‌نه نُهاݚِن بی. یکیسوٚۨ اُچو که سرِسِ نهاݚن بی و دیری جا پاهاس. 13 مِلاکه‌یَل بِس گوݚِن: «زیٚنه سی چه اِگریٚوی؟» جَواو داݚ: «مَیݚ عیسی‌نه بُردِنه و نَونُم کُیه نهاݚِنِسه.» 14 یونه که گوݚ، ری کِرد واپُشت و عیسی‌نه دیݚ که هَموچو واستاݚه‌یه، اما نَیَشنَحݚِس. 15 عیسی بِس گوݚ: «زیٚنه، سی چه اِگِریٚوی؟ جُست کیٚ اِگردی؟» مریم به گِموٚنِ یو که باغِووٚنه، گوݚ: «آقا، اَیَر تو مَیݚِ وُرداشتیه، بُم بگو کویه نهاݚیسه تا رُم، بیارُمِس.» 16 عیسی بَنگ کِرد: «مریم!» مریم ری کِرد طِرَفِس و به زوٚن عبری گوݚ: «رَبّونی!» (که مَعنیݚِس مَعٛلَم اِبو). 17 عیسی بِس گوݚ: «دَست مَهٛنه کݚُم، سی یو که هَنی نَرَهݚُمه به آسِموٚۨ تَی پݚرُم. اما رَو تَی گویَلُم و بُسوٚۨ بُگو که اِرُم به آسِموٚۨ تَی پݚرُم و پݚر ایسا و خݚا خوم و خݚا ایسا.» 18 مریم مجدلیه رَهݚ تی شاگردوٚن و بسوٚۨ گوݚ: «عیسی خݚاوندِ دیݚُمه!» و تعریٚف کرد که عیسی‌ چه گوݚه.عیسی به شاگِردوٚۨ ظاهر اِبو 19 هَمو روز یَه‌شمبݚُ مَوِݚ اَفتودَرَو، که شاگِردوٚن عیسی دَور یَک جَم وابیݚِن بی و زِ ترس یهوݚیوٚۨ دَرانه قُلف کِردِن بی، عیسی اوَیݚ و واستاݚ مِنجاسوٚن و گوݚ: «حَضرات سلام!» 20 یونه گوݚ و دَستا و پَهلیسِ نِشوٚنسوٚۨ داݚ. شاگردوٚۨ عیسی‌نه که دیݚن شاݚ وابیݚِن. 21 عیسی دُوارته بِسوٚۨ گوݚ: «حَضرات سلام! هَموطَور که پݚرُم مونه فِشناݚ به ای دنیاهو، مو هم ایسانه اِفِشنُم بینِ مردم.» 22 یونه که گوݚ، کُوف کشیݚ بِسوٚن و گوݚ: «روحُ‌القُدُس نَصیوتوٚن وابو. 23 اَیَر گُنه‌ها یکی‌نه بُوَشخین، بَشخیݚه اِبون، و اَیَر گنه‌ها آݚُمیٚ‌نه نَبشخیݚه بیٚلین، بَشخیݚه نیٚ‌بوهِن.»عیسی و توما 24 وَختیٚ که عیسی اوَیݚ، توما که یکی زِ او دُوازده شاگِرد بیݚ و بِس اِگوݚِن جُمِلو، اُچو نَبیݚ. 25 پَه باقیٚ شاگردوٚۨ بِس گوݚِن: «ایما عیسی خݚاوند دیݚیمه!» توما جواو داݚ: «مو تا خوم جا میٚخانه مِن تَنگه‌هاس نَبینُم و اَنگُستُمِ نَنُم جا میٚخا و دستُمِ نَزَنُم کݚ سیلا پَهلیس، باور نیٚ‌کُنُم.» 26 هشت روز بَعٛݚ هو، شاگردوٚنِ عیسی زِنوتَره مِن حوٚنه بیݚِن و توما هم واباسوٚۨ بیݚ.